మహిళల రక్షణే లక్ష్యం: శక్తి టీమ్ ఆధ్వర్యంలో విస్తృత అవగాహన🙏

పాలకొండ వెబ్ న్యూస్: మహిళలు మరియు బాలికల రక్షణ కోసం ప్రభుత్వం ప్రవేశపెట్టిన శక్తి యాప్ మరియు హెల్ప్ లైన్ నంబర్లపై పాలకొండ పట్టణంలో శక్తి టీమ్ సభ్యులు సోమవారం విస్తృత అవగాహన కార్యక్రమాలు నిర్వహించారు. పాలకొండ టౌన్ పరిధిలోని అన్నవరం డీఏవీ పబ్లిక్ స్కూల్, కొండాపురం ఎంపీపీ స్కూల్ మరియు వివిధ కళాశాలల్లో విద్యార్థులకు, మహిళలకు భద్రతా చర్యలపై అవగాహన కల్పించారు. ఈ సందర్భంగా మహిళా ఏఎస్ఐ జి. ఝాన్సీ భాయ్ మరియు ప్రకృతాంబ మాట్లాడుతూ, ఆపదలో ఉన్న మహిళలు తక్షణ సహాయం కోసం 'శక్తి యాప్' ను వినియోగించుకోవాలని లేదా వెంటనే 112 నంబర్‌కు కాల్ చేయాలని సూచించారు.

నేటి సమాజంలో పెరిగిపోతున్న సైబర్ క్రైమ్ నేరాలు మరియు మాదక ద్రవ్యాల దుష్ప్రభావాల పట్ల విద్యార్థులు అప్రమత్తంగా ఉండాలని వారు హెచ్చరించారు. విద్యార్థులు మంచి, చెడుల మధ్య వ్యత్యాసాన్ని గుర్తించి, క్రమశిక్షణతో కూడిన నడవడికతో బాధ్యతగల పౌరులుగా ఎదగాలని, తల్లిదండ్రులు మరియు ఉపాధ్యాయులను గౌరవించాలని ఆకాంక్షించారు. అత్యవసర పరిస్థితుల్లో బాలబాలికల రక్షణ కోసం 181 నంబర్‌ను, సైబర్ క్రైమ్ ఫిర్యాదుల కోసం 1930 నంబర్‌ను మరియు మాదకద్రవ్యాల నియంత్రణ సమాచారం కోసం 1972 నంబర్‌ను సంప్రదించాలని వివరించారు. ఈ కార్యక్రమంలో శక్తి టీమ్ సభ్యులు మహిళా ఏఎస్ఐ జి. ఝాన్సీ భాయ్, ప్రకృతాంబతో పాటు కానిస్టేబుల్స్ గిరి, రాము, శోభారాణి మరియు పాఠశాల సిబ్బంది పాల్గొన్నారు.