రైస్ మిల్లు కార్మికులకు సంక్షేమ బోర్డు ఏర్పాటు చేయాలి: సిఐటియు డిమాండ్

పాలకొండ వెబ్ న్యూస్: రైస్ మిల్లు కార్మికులకు సమగ్ర భద్రత సంక్షేమ బోర్డు ఏర్పాటు చేయాలని, ఈఎస్ఐ, పిఎఫ్ సదుపాయాలు కల్పించాలని కోరుతూ పాలకొండలో నిర్వహించిన రైస్ మిల్స్ వర్కర్స్ యూనియన్ (సిఐటియు) జనరల్ బాడీ సమావేశం డిమాండ్ చేసింది. ఈ సందర్భంగా సిఐటియు జిల్లా అధ్యక్షులు ధావాల రమణారావు, యూనియన్ అధ్యక్ష కార్యదర్శులు జి సత్యం, వై శ్రీనివాసరావు మాట్లాడుతూ, ప్రాణాలకు తెగించి మూటలు మోస్తున్న కార్మికులకు పెరుగుతున్న ధరల ప్రకారం వేతనాలు అందడం లేదని ఆవేదన వ్యక్తం చేశారు.

​ముఖ్యంగా 50 ఏళ్లు దాటిన కార్మికులకు పెన్షన్ సౌకర్యం కల్పించాలని, అనారోగ్యం పాలైతే ఆదుకునే వ్యవస్థ లేదని వారు పేర్కొన్నారు. పాలకొండ మండలంలోని 8 మిల్లుల్లో పిఎఫ్, ఈఎస్ఐ, గ్రాడ్యుటీ వంటి సౌకర్యాలు అమలు కావడం లేదని, 2026 జనవరి 1 నుంచి అమలు కావాల్సిన నూతన వేతన ఒప్పందంపై యాజమాన్యాలు కాలయాపన చేస్తున్నాయని విమర్శించారు. అధికారులు స్పందించి సమస్యలు పరిష్కరించకుంటే ఐక్య పోరాటాలకు సిద్ధమవ్వాలని పిలుపునిచ్చారు. ఈ కార్యక్రమంలో కాదా రాము, దూసి దుర్గారావు, వై సింహాచలం, సిహెచ్ స్వామి నాయుడు, గణ తదితరులు పాల్గొన్నారు.