ఆందోళనతో సతమతమవుతున్న రాము ఒకరోజు తన గురువుగారి దగ్గరకు వెళ్లి, "గురుదేవా! నేను బాగానే చదువుతున్నాను, కానీ పరీక్ష అనగానే నాలో టెన్షన్ పెరిగిపోతోంది. సమాధానాలు సరిగ్గా రాయలేకపోతున్నాను. దీనికి పరిష్కారం లేదా?" అని బాధగా అడిగాడు.
గురువుగారు చిరునవ్వు నవ్వి, "రాము, నీకు ఒక అద్భుతమైన నిజ జీవిత కథ చెప్తాను విను" అంటూ క్లిఫ్ యంగ్ అనే ఒక సాధారణ రైతు కథను చెప్పడం ప్రారంభించారు.
క్లిఫ్ యంగ్: నమ్మశక్యం కాని ఒక విజేత!
1983వ సంవత్సరంలో ఆస్ట్రేలియాలో సిడ్నీ నుండి మెల్బోర్న్ వరకు దాదాపు 875 కిలోమీటర్ల సుదీర్ఘమైన పరుగు పందెం (Ultramarathon) జరిగింది. ఆ పందెంలో ప్రపంచవ్యాప్తంగా ఎంతోమంది యువకులు, అత్యుత్తమ శిక్షణ పొందిన రన్నర్లు పాల్గొన్నారు.
కానీ అందరినీ ఆశ్చర్యపరుస్తూ 61 సంవత్సరాల వయసున్న క్లిఫ్ యంగ్ అనే ఒక సాధారణ రైతు, తన పాత బట్టలు, గొర్రెల కాపరులు వేసుకునే బూట్లతో ఆ పోటీలో నిలబడ్డాడు. అతనికి ఎలాంటి రన్నింగ్ అనుభవం లేదు, కనీసం సరైన కోచ్ కూడా లేడు. పందెం మొదలైంది. ప్రొఫెషనల్ రన్నర్లు అందరూ పరుగెడుతూ, రాత్రి పూట కాసేపు నిద్రపోతూ సాగిపోతున్నారు. కానీ క్లిఫ్ యంగ్ మాత్రం రాత్రి పగలు తేడా లేకుండా ధ్యాసగా పరుగెడుతూనే ఉన్నాడు.
చివరికి, కేవలం 5 రోజుల 9 గంటల్లో ఆ గమ్యాన్ని చేరుకుని, పాత రికార్డులన్నింటినీ బద్దలు కొట్టి క్లిఫ్ యంగ్ విజేతగా నిలిచాడు!
పాత్రికేయులు ఆశ్చర్యపోయి అడిగారు: "అసలు ఎలాంటి శిక్షణ లేకుండా ఈ వయసులో మీరిది ఎలా సాధించారు? మీ విజయ రహస్యం ఏంటి?"
దానికి క్లిఫ్ యంగ్ చాలా అమాయకంగా ఇలా సమాధానమిచ్చాడు:
"మాది ఒక పేద రైతు కుటుంబం. మాకు 2,000 గొర్రెలు ఉండేవి. అవి విశాలమైన పొలాల్లోకి వెళ్ళిపోయినప్పుడు, వాటిని వెనక్కి తీసుకురావడానికి రోజులు తరబడి వాటి వెనకాలే పరుగెత్తేవాడిని. ఆ గొర్రెల వెనకాల ఎలా పరుగెత్తానో, ఈ పోటీలో కూడా అలాగే పరుగెత్తాను. ఇక్కడ గెలవాలి, రికార్డు సృష్టించాలి అనే ఒత్తిడి (Tension) నా మనసులో లేదు. కేవలం పరుగెత్తడం మాత్రమే నా పని అనుకున్నాను."
కథ ఇచ్చే సందేశం:
కథ మొత్తం విన్న గురువుగారు రాము వైపు చూసి ఇలా అన్నారు:
"చూశావా రాము! క్లిఫ్ యంగ్ మనసులో 'నేను గెలవాలి, ఒకవేళ ఓడిపోతే ప్రపంచం నన్ను చూసి నవ్వుతుంది' అనే ఆలోచనే లేదు. అతను కేవలం ప్రస్తుతం తను చేయాల్సిన పని మీద మాత్రమే దృష్టి పెట్టాడు.
భగవద్గీతలో శ్రీకృష్ణుడు అర్జునుడికి చెప్పిన పరమ సత్యం కూడా ఇదే:
"కర్మణ్యేవాధికారస్తే మా ఫలేషు కదాచన..."
అంటే—పని చేయడం మాత్రమే నీ చేతుల్లో ఉంది, కానీ దాని ఫలితం నీ చేతుల్లో లేదు.
నువ్వు చదివేటప్పుడు భవిష్యత్తులో వచ్చే మార్కుల గురించి, ఫలితాల గురించి ఆలోచించి ఆందోళన చెందడం వలనే నీ సామర్థ్యం తగ్గిపోతోంది. క్లిఫ్ యంగ్ గొర్రెల వెనుక ఎంత సహజంగా పరుగెత్తాడో... నువ్వు కూడా పరీక్షలను ఒక ఒత్తిడిలా కాకుండా, రోజూ చదువుకునేలాగే సహజంగా భావించు. ఫలితాన్ని దేవుడికి వదిలేసి, నీ ప్రయత్నాన్ని వంద శాతం నమ్మకంతో చేయి."
గురువుగారి మాటలతో రాములోని భయం పటాపంచలైంది. ఒక కొత్త నమ్మకంతో, టెన్షన్ లేకుండా ప్రశాంతంగా పరీక్షలు రాసి మంచి మార్కులతో విజయం సాధించాడు.
ముగింపు (Takeaway):
మనం చేస్తున్నప్పుడు దాని తప్ప వేరే దాని గురించి ఆలోచించవద్దు. భవిష్యత్తులో ఎలాంటి ఫలితం కలుగుతుందోనని ఎప్పుడూ ఆలోచించేవాడు దేన్నీ సాధించలేడు. కష్టపడండి, కానీ ఎప్పుడూ ఒత్తిడితో కాదు!
.రచన. బి. ఎస్.ఎస్. ప్రసాద్..
0 Comments