రథయాత్ర ముగించుకుని స్వామివారు తిరిగి ప్రధాన ఆలయానికి చేరుకునే 'నీలాద్రి విజె' ఘట్టంలో ఒక అరుదైన సన్నివేశం చోటుచేసుకుంటుంది. తమను వెంటబెట్టుకుని వెళ్లకుండా ఒంటరిగా వెళ్లిపోయారని ఆగ్రహించిన శ్రీమహాలక్ష్మీ దేవి, స్వామివారిని సింహద్వారం వద్దే అడ్డుకుని ఆలయ తలుపులు మూసివేస్తుంది. ఈ సందర్భంగా దంపతుల మధ్య జరిగే సరదా వాదన భక్తులను విశేషంగా ఆకట్టుకుంటుంది. మహాలక్ష్మీ దేవి తన ఒంటరితనాన్ని, బాధను వ్యక్తం చేయగా, జగన్నాథుడు మధురమైన మాటలతో ఆమెను శాంతింపజేసేందుకు ప్రయత్నిస్తారు. అమ్మవారి అలక తీర్చడానికి స్వామివారు నోరూరించే రసగుల్లా ప్రసాదాన్ని, సుందరమైన పట్టు చీరను కానుకగా సమర్పిస్తూ, భక్తుల పట్ల తన బాధ్యతను, పిన్నమ్మల దర్శన విశేషాలను ప్రేమతో వివరిస్తారు.
ఈ దివ్య దంపతుల సంవాదం మానవీయ భావోద్వేగాలకు అద్దం పడుతుందని ఆలయ ప్రధాన అర్చకులు శ్రీ మఠం విశ్వనాధ దాసు తెలిపారు. దాంపత్య జీవితంలో కలిగే చిన్నచిన్న విభేదాలను కోపంతో కాకుండా ప్రేమ, సహనం, క్షమాగుణంతో పరిష్కరించుకోవాలనే గొప్ప సందేశం ఈ లీల వెనుక ఉందని ఆయన పేర్కొన్నారు. కాగా, శ్రీ జగన్నాథ స్వామివారి రథోత్సవ సందర్భంగా లక్ష్మీదేవి - శ్రీ స్వామివారి వాదన ఘట్టం ఈ నెల 26వ తేదీ ఆదివారం అత్యంత వైభవంగా జరుగుతుందని ఆలయ కార్యనిర్వహణాధికారి కే. పరమేశ్వరి తెలిపారు. భక్తజనులందరూ ఈ ఆధ్యాత్మిక ఘట్టాన్ని తిలకించి స్వామివారి కృపకు పాత్రులు కావాలని ఆమె కోరారు.
0 Comments