పాలకొండ వెబ్ న్యూస్ : నగర పంచాయతీ పరిధిలోని నక్కలపేట సాయిదుర్గా నగర్ 7వ లైన్‌లో బుధవారం ఉదయం 7 గంటల సమయంలో తీవ్ర భయాందోళనకర సంఘటన చోటుచేసుకుంది. స్థానిక నివాసి ఆవు రాము కుమార్తె తనూషపై ఒకేసారి సుమారు 7,8 వీధి కుక్కలు దాడి చేసి తీవ్రంగా గాయపరిచాయి. ఈ ఘటనపై సురవరపు కృష్ణారావు వెంటనే స్పందించి పాలకొండ నగర పంచాయతీ కమిషనర్‌కు సమాచారం అందించారు. కమిషనర్ వెంటనే సంఘటనా స్థలానికి చేరుకోగా, అప్పటికే గాయపడిన చిన్నారిని చికిత్స నిమిత్తం పాలకొండ ఏరియా ఆసుపత్రికి తరలించారు. అనంతరం కమిషనర్ ఆసుపత్రికి వెళ్లి చిన్నారిని పరామర్శించి, ఆరోగ్య పరిస్థితిని పరిశీలించారు. పట్టణంలో తీవ్రమవుతున్న వీధి కుక్కల బెడదను అరికట్టాలని, తగిన నివారణ చర్యలు చేపట్టాలని సురవరపు కృష్ణారావు ఈ సందర్భంగా కమిషనర్‌ను కోరారు. దీనిపై కమిషనర్ సానుకూలంగా స్పందిస్తూ, వెంటనే తగిన చర్యలు తీసుకుంటామని హామీ ఇచ్చారు. వీధి కుక్కల భయం నుంచి తమకు విముక్తి కలిగించాలని నక్కలపేట సాయిదుర్గా నగర్ వాసులు విజ్ఞప్తి చేస్తున్నారు.
0 Comments